Hyggst verja sig sjálfur

Radovan Karadzic, sem er sakaður um þjóðarmorð og glæpi gegn mannkyninu, hyggst verja sig sjálfur þegar stríðsglæpadómstóllinn í Haag mun rétta í máli hans. Frá þessu greindi lögmaður Karadzic í dag.

Hann segir að Karadzic muni njóta liðsinnis lögfræðinga í Serbíu við að undirbúa vörn sína, en að öðru leiti muni Karadzic verja sig sjálfur.

Karadzic fetar þar með í fótspor Slobodan Milosevic, fyrrum forseta Júgóslavíu, sem varði sig sjálfur þegar stríðsglæpadómstóllinn í Haag réttaði í máli hans.

Karadzic var handtekinn á mánudag eftir að hafa farið huldu höfði í um 13 ár. Hann er í haldi lögreglu í Belgrad á meðan hann bíður eftir því að verða framseldur til Hollands, þar sem stríðsglæpadómstóllinn hefur aðsetur sitt.

Fram hefur komið að verjandi Karadzic muni áfrýja framsalsúrskurðinum.

• 4 blogg um fréttina

Bloggað um fréttina

• Snorri Bergz: Sjálfsvörn
• Markús frá Djúpalæk: Réttur maður?
• Emil Örn Kristjánsson: Sá á ekki von á góðu
• Jakob Falur Kristinsson: Radowan Karadizic