Fimm mótmælendur og einn lögreglumaður meiddust í átökunum. Það er fréttavefurinn Sky sem greinir frá þessu.

Tomislav Nikkolic, leiðtogi öfgaþjóðernishreyfingarinnar Róttæki serbneski flokkurinn, sagði um handtökuna: Þetta er erfiður dagur fyrir Serbíu. Hann var goðsögn meðal þjóðarinnar.

Ríkisstjórn Serbíu, undir stjórn Boris Tadic, sem kosin var fyrir tveimur vikum hefur einnig lofað að elta uppi Ratko Mladic, fyrrverandi herforingja Serbíuhers.

Utanríkisráðherra Serbíu, Vuk Jeremic, sagði yfirvöld hafa handtekið Karadzic þar sem stjórnin taki erlendar skuldbindingar sínar mjög alvarlega.

Karadzic og Mladic eru eftirlýstir fyrir ákærur um þjóðarmorð og stríðsglæpi fyrir meintar gjörðir sínar í Bosníustríðinu 1992-1995.

Embættismenn Evrópusambandsins hafa lýst því yfir að handtaka Karadzic hafi ýtt mjög undir möguleika Serba á að ganga í sambandið. Þeir hafa hvatt stjórnvöld í Serbíu til að fylgja þessu eftir með því að handtaka Mladic svo fljótt sem auðið er.

Karadzic hyggst berjast gegn því að vera framseldur til stríðsglæpadómstólsins í Haag. Serbneski stríðsglæpasaksóknarinn segir að serbneskur dómari sé búinn að yfirheyra Karadzic og lýst því yfir í framhaldinu að hægt sé að framselja hann stríðsglæpadómstólnum.

Karadzic mun hafa lið lögfræðinga í Serbíu en hyggst að öðru leyti verja sig sjálfur fyrir dómstólnum í Haag. Lögfræðingur hans segir að forsetinn fyrrverandi sé sannfærður um að hann muni sigra í málinu með Guðs hjálp.