Radovan Karadzic, í gervi Dragan Dabic, með Milu, sem sögð er hafa verið kærasta hans. AP

Talsmaður ríkissaksóknara Serbíu segir að svo virðist sem Radovan Karadzic, fyrrum leiðtogi Bosníu-Serba, hafi fengið fölsk persónuskilríki í valdatíð Slobodan Milosevic, fyrrum forseta landsins, sem hafi gert honum kleift að lifa eðlilegu lífi undanfarin ár. Þetta kemur fram á fréttavef BBC. 

Talsmaðurinn Bruno Vekaric,segir jafnframt að unnið sé að rannsókn á því hverjir aðstoðuðu Karadzic við að fara huldu höfði og að þeir hinir sömu verði sóttir til saka. Þá segir hann ljóst að um viljaverk, þeirra sem hlut áttu að máli, hafi verið að ræða. 

Greint hefur verið frá því í fjölmiðlum í Serbíu að Karadzic hafi notað fölsuð persónuskilríki sem gefin voru út í bænum Ruma, norður af Belgrad, og að hann hafi sennilega fengið þau með hjálp Slobodan Medic, sem dæmdur hefur verið fyrir stríðsglæpi. 

Karadzic gekk undir nafninu Dragan Dabic en líkum hefur verið leitt að því að inn raunverulegi Dragan Dabic hafi látið lífið í Bosníustríðinu. 

Karadzic, sem hefur farið huldu höfði í þretttán ár, var handsamaður fyrir tæpri viku, og á hann yfir höfði sér framsal til stríðsglæpadómstóls SÞ í hag, þar sem hann hefur verið ákærður fyrir stríðsglæpi og þjóðarmorð.