Tvö ung börn hafa látið lífið í Frakklandi á undanförnum dögum eftir að foreldrar þeirra skildu þau eftir í bíl. Bílarnir hitnuðu gríðarlega í sólskininu með þeim afleiðingum að börnin létust af völdum vökvataps og hita.

Breska blaðið The Times hefur eftir frönskum saksóknurum að Zoé, 3 ára gömul stúlka, hafi í gær látist í bænum Saint-Marcel í austurhluta Frakklands. Faðir hennar ók til vinnu um morguninn og virðist ekki hafa gert sér grein fyrir því að stúlkan var í aftursæti bílsins en hann hélt að stúlkan yrði hjá móður sinni um daginn.

Um fimm tímum síðar fór faðirinn að sækja 5 ára gamlan son sinn á barnaheimili. Það var ekki fyrr en hann ætlaði að hleypa drengnum inn í bílinn að hann sá stúlkuna látna í aftursætinu. Talið er að hitinn í bílnum hafi komist í 45 gráður yfir daginn.

Lögregla segist ekki enn hafa getað yfirheyrt manninn vegna þess að hann hafi fengið andlegt áfall og sé á sjúkrahúsi. Hann hefur samt verið formlega handtekinn og á yfir höfði sér ákæru fyrir manndráp af gáleysi. 

Í síðustu viku lést einnig tveggja ára gamall drengur þegar faðir hans gleymdi honum í bíl í Pont-de-Chéruy í austurhluta Frakklands.