Radovan Karadzic, fyrrum leiðtogi Bosníu-Serba, hefur verið framseldur til Stríðsglæpadómstólsins í Haag og fluttur til Hollands.  Karadzic var fluttur úr fangelsi í Belgrad í nótt og fluttur með lögreglufylgd í þotu sem lenti fyrir skömmu í Hollandi. 

Handtöku Karadzic var mótmælt í miðborg Belgrad í gær þar sem tugir þúsunda serbneska þjóðernissinna komu saman.  Lögreglan beitti m.a. táragasi og skaut gúmmíkúlum til þess að dreifa mannfjöldanum, sem svaraði með grjótkasti.  Þá leituðu nokkrir tugir manna á slysadeildir sjúkrahúsa í borginni.

Karadzic var handtekinn fyrir rúmri viku síðan eftir að hafa verið í felum í meira en áratug.  Hann hefur verið ákærður fyrir þjóðarmorð og stríðsglæpi gegn Króötum og múslimum í Bosníu og Hersegóvínu meðan á borgarastríðinu þar stóð á árunum 1992-1995, þar á meðal fyrir morð á nærri 8000 múslimum í Srebrenica árið 1995.