Rússnesk herþota sést hér varpa sprengjum á skotmark í Georgíu. Reuters

Condoleezza Rice, utanríkisráðherra Bandaríkjanna, hefur hvatt rússnesk stjórnvöld til að draga herlið sitt frá Georgíu. Rússar sendu í dag hermenn til að aðstoða aðskilnaðarsinna í Suður-Ossetíu. Hörð átök geisa nú á milli stjórnarhersins og Rússa.

„Bandaríkin kalla eftir því að vopnahlé verði samþykkt þegar í stað í Suður-Ossetíuhéraði Georgíu,“ sagði Rice í yfirlýsingu sem hún sendi frá sér.

Hún kallar jafnframt eftir því að Rússar hætti árásum sínum á Georgíumenn, en Rússar hafa bæði gert loftárásir og skotið flugskeytum á stjórnarhermenn.

Rice segir að Bandaríkin og bandamenn þeirra í Evrópu vinni nú hörðum höndum að því að reyna að miðla málum og binda enda á átökin. Hún bætir við að hátt settir bandarískir embættismenn hafi rætt við báða deiluaðila.

Stjórnvöld í Georgíu saka Rússa um að vilja koma á stríði. Þau segja að mikið mannfall hafi orðið í árásum Rússa. Því neita hins vegar rússnesk stjórnvöld.