Sergei Lavrov, utanríkisráðherra Rússlands, sagði í morgun að enginn staður í Georgíu, sem notaður væri fyrir árásir á Suður-Ossetíu, væri öruggur. Hann segir, að um 1500 manns hafi látið lífið í átökum aðskilnaðarsinna og Georgíuhers síðustu daga.

Rússneski herinn staðfesti í dag, að tvær rússneskar herflugvélar hefðu verið skotnar niður yfir Georgíu í gær en Georgíustjórn sagði vélarnar sex.

Georgíuher hóf stórsókn gegn aðskilnaðarsinnum í Suður-Ossetíu, sem er hérað í Georgíu en íbúar þar hafa löngu sagt sig úr lögum við landið. Sögðu stjórnvöld í Georgíu, að þau hefðu neyðst til að grípa til aðgerða vegna árása uppreisnarmanna í Suður-Ossetíu.

Aðskilnaðarsinnar héldu því hins vegar fram, að Georgíumenn hefðu rofið eigið vopnahlé. Rússar hafa náin tengsl  við héraðið og brugðust við með því að senda vopnaðar skriðdrekasveitir þangað. Mikil hætta er talin á því, að átökin, sem  í gær voru aðallega í héraðshöfuðborginni  Tskhinvali leiði til stríðs milli Georgíu og Rússlands. 

Dimitrí Medvedev, forseti Rússa, sagði að rússneskur her hefði í gær farið inn í Suður-Ossetíu til að neyða Georgíumenn til að fallast á vopnahlé.

Medvedev sagði, að rússneskir hermenn hefðu einnig það hlutverk að vernda óbreytta borgara í Suður-Ossetíu, sem margir eru með rússneskt vegabréf.

Georgíumenn sökuðu Rússa í gær um að ráðast á herstöðvar og byggingar og óskuðu eftir aðstoð alþjóðasamfélagsins við að reka Rússa af höndum sér.

Þegar Lavrov var í morgun beðinn um að tjá sig um ásakanir Georgíumanna um að sprengjuárásir Rússa svaraði ráðherrann, að Georgía hefði ráðist á rússneska friðargæsluliða og óbreytta borgara. Georgíumenn ættu að vita, að svæði, sem notuð séu til slíkra árása, séu ekki örugg. 

Lavrov var spurður hvort Rússar kynnu að gera árás á Tbilisi, höfuðborg Georgíu, en svaraði: „Ég held ekki að sprengjuárásirnar komi frá Tbilisi en enginn sá staður, sem notaður er undir árásir, er öruggur.