Vopnaðir Suður-Ossetar í dag. Reuters

Utanríkisráðherrar Evrópusambandsins samþykktu á fundi í Brussel í dag, að axla stærra hlutverk í Georgíu en ESB hefur gert til þessa. Meðal annars verður skoðað hvort ESB sendir friðargæsluliða til landsins til að tryggja að vopnahléssamkomulag Georgíumanna og Rússa verði haldið.

Bernard Kouchner, utanríkisráðherra Frakklands, sagði að Evrópusambandið væri staðráðið í því að láta til sín taka í þessu máli. Sagði hann við blaðamenn, að það væri uppörvandi að ESB-ríki vildu taka þátt í sendinefnd til Georgíu en of snemmt væri að fjalla um hlutverk sambandsins þar í smáatriðum.

Í yfirlýsingu, sem ráðherrarnir samþykktu, eru deiluaðilar hvattir til að virða skuldbindingar friðarsamkomulagsins þannig að vopnahlé taki gildi og samkomulaginu sé framfylgt. 

Segja ráðherrarnir, að koma þurfi sem fyrst á eftirliti með friðarsamkomulaginu í samræmi við ályktun Sameinuðu þjóðanna.

Aðstoðarinnanríkisráðherra Georgíu dró nú eftir hádegið til baka fréttir um að skriðdrekar Rússa stefndu í átt að Tbilisi, höfuðborg Georgíu. Forseti Georgíu sagði í morgun, að Rússar virtust ætla að umkringja höfuðborgina.