Alþjóðlegi Rauði Krossinn vinnur nú að því að flytja hjálpargögn til Georgíu. Samtökin hafa ekki fengið aðgang að Suður-Ossetíu en vinnur að dreifingu hjálpargagna í Norður-Ossetíu. Samtökin hafa minnst stríðsaðila á skyldur þeirra samkvæmt alþjóðasamningum.

Á næstu dögum mun Alþjóða Rauði krossinn flytja mikilvæg hjálpargögn til Georgíu til aðstoðar þeim sem stærst hafa í bardögunum. Fimmtán tonn af lyfjum og sjúkragögnum verða send með leiguflugi frá Genf ásamt vatnshreinsibúnaði sem séð getur um 20.000 manns fyrir hreinu drykkjarvatni.Þetta kemur fram á heimasíðu Rauða Krossins.

Í Suður-Ossetíu hafa staðið yfir harðir bardagar milli herja Georgíu, Rússlands og aðskilnaðarsinna. Alþjóða Rauði krossinn mun senda út neyðarbeiðni til styrktaraðila um fjárframlög til að bregðast megi við versnandi mannúðarástandi á svæðinu.

Átökin eru nú farin að breiðast út fyrir Suður-Ossetíu og Alþjóða Rauða krossinum berast sífellt fleiri fregnir af mannfalli úr röðum óbreyttra borgara. „Ástand íbúanna er enn mjög slæmt,“ segir Dominique Liengme, yfirmaður sendinefndar Alþjóða Rauða krossins í Georgíu. „Alþjóða Rauða krossinum tókst að senda teymi sendifulltrúa til bæjarins Gori í Georgíu til að kanna ástandið og þeir hafa staðfest að margir óbreyttir borgarar hafi flúið heimili sín á átakasvæðum.“

„Hingað til hefur Alþjóða Rauði krossinn ekki fengið aðgang að Suður-Ossetíu. Það er hins vegar forgangsmál okkar,“ segir Dominique. „Bardagar hafa verið of harðir til að við gætum ferðast um eða dreift hjálpargögnum en við sækjumst eftir því að fá óheftan aðgang að öllum bardagasvæðum og að sendifulltrúum verði tryggt fullt öryggi.“

Í Norður-Ossetíu vinnur Rauði krossinn með rússneskum yfirvöldum að dreifingu hjálpargagna til flóttafólks sem hefur yfirgefið Suður-Ossetíu.

Alþjóða Rauði krossinn hefur opinberlega minnt Georgíu og Rússland á skyldur þeirra samkvæmt alþjóðasáttmálum.

Alþjóða Rauði krossinn leitast við að fá aðgang að fólki sem haldið er föngnu í tengslum við átökin, þar á meðal tvo rússneska flugmenn sem eru særðir og eru í haldi georgískra yfirvalda. Alþjóða Rauði krossinn hefur einnig beðið um að fá afhent lík af rússneskum flugmanni sem lét lífið í bardögunum.