Frá Tinganesi í Þórshöfn þar sem skrifstofur landsstjórnarinnar eru. mbl.is/Dagur

Miklir fundir hafa verið á færeyska stjórnarheimilinu um helgina eftir að einn af þingmönnum Þjóðveldisins lýsti andstöðu við frumvarp  stjórnarinnar um fækkun veiðidaga. Nýlega gekk einn þingmaður Jafnaðarflokksins aftur úr skaptinu vegna ágreinings við hina stjórnarþingmennina um forgangsröðum jarðganga og þá missti stjórnin meirihlutann á Lögþinginu.

Landsstjórnin náði í síðustu viku samkomulagi við Sjálfstýrisflokkinn um að þingmenn hans, sem eru 2, myndu verja stjórnina falli í mikilvægum málum. Nú er ljóst að það mun varla duga til lengur.

Vangaveltur voru um það, að Þjóðveldið myndi um helgina slíta stjórnarsamstarfinu, en í gærkvöldi lýsti Høgni Hoydal, formaður flokksins, því yfir að staðið verði við alla þá samninga, sem gerðir hafi verið. Samkomulag hafi náðst um það, að Jóannes Eidesgaard, lögmaður og leiðtogi Jafnaðarflokksins, bjóði stjórnarandstöðuflokkunum til viðræðna með það að markmiði að breikka grundvöll stjórnarinnar og tryggja stöðugleika í færeyskum stjórnmálum.

Þingkosningar voru í Færeyjum í janúar og þá fékk Jafnaðarflokkurinn  sex þingsæti, Þjóðveldið átta og Miðflokkurinn þrjú. Þessir flokkar mynduðu síðan stjórn þótt þeir hefðu aðeins eins þingsætis meirihluta.

Utan stjórnarinnar voru  Sambandsflokkurinn með sjö þingmenn, Fólkaflokkurinn með 7 og Sjálfstýriflokkurinn með 2. 

Leiðtogar Sambandsflokksins og Fólkaflokksins hafa í morgun sagt, að sjálfsagt sé að ræða við stjórnarflokkanna þótt réttast sé að Eidesgaard biðjist lausnar og mynduð verði ný landsstjórn. Jørgin Niclasen, formaður Fólkaflokksins, sagði einnig við færeyska útvarpið í morgun, að ekki komi til greina að flokkurinn styðji óbreytta stefnu stjórnarinnar.