Reuters

Sænska útlendingaeftirlitið hefur áhyggjur af því að íraskir flóttamenn nýti sér styrk sem flóttamönnum, sem er neitað um hæli, stendur til boða af sænska ríkinu.  Hafa starfsmenn útlendingaeftirlitsins haft samband við dómsmálaráðuneytið þar sem þeir telja að einhverjir flóttamenn komi til landsins til þess eins að fá greiddan styrkinn og ætli sér aldrei að setjast að í Svíþjóð.

Í frétt á vef Dagens Nyheter kemur fram að í bréfi sem sent var til ráðuneytisins komi fram að einhverjir útlendingar óski eftir hæli í Svíþjóð án þess að ætla sér að búa í landinu. Eina ástæðan sé að þiggja styrk frá sænska ríkinu.

Svíþjóð hefur frá því í ársbyrjun í fyrra hert þær reglur sem gilda um flóttamenn sem sækja um hæli í landinu og fá færri hæli nú en áður. Mun algengara er að flóttamennirnir séu sendir til síns heima og er það gert þrátt fyrir að þeir komi frá stríðshrjáðum löndum eins og Írak, Sómalíu og Afganistan.

Frá því í ágúst í fyrra hefur þeim flóttamönnum, sem koma frá fyrrnefndum löndum, og  sendir eru úr landi, staðið til boða fjárstuðningur ef þeir fara til síns heima af fúsum og frjálsum vilja. Hver fullorðinn einstaklingur getur fengið 20 þúsund sænskar krónur, 260 þúsund krónur,  og börn 10 þúsund sænskar krónur. Hver fjölskylda getur þó ekki fengið meira en 50 þúsund sænskar krónur, 650 þúsund íslenskar krónur.

Í frétt DN kemur fram að 159 Írakar hafi í ár óskað eftir styrk eftir að hælisumsókn þeirra hafi verið hafnað en að 207 hafi dregið umsókn um hæli til baka áður en þeir óskuðu eftir styrk sænska ríkisins.

Filippa Nordfeldt, hjá sænska útlendingaeftirlitinu, staðfestir ekki fjöldann sem hefur dregið umsókn til baka en staðfestir að eftirlitið telji að kerfið hafi verið misnotað.

DN tekur dæmi af Íraka sem sótti um styrk til þess að fara aftur heim eftir að hafa dvalið einungis í átta daga í Svíþjóð. Umsókn hans um styrk var hafnað.