Fjórtán ára indverskur skólapiltur hefur verið handtekinn grunaður um að hafa myrt tíu ára stúlku sem neitaði að láta iPod sinn af hendi. Er talið að pilturinn hafi hent stúlkunni fram af níu metra hárri brú í gær og síðan kyrkt hana er hún lá meðvitundarlaus á jörðinni.

Að sögn Swapan Banerjee, yfirmanns í lögreglunni í Seuri, heimabæ barnanna, er um morð af yfirlögðu ráði að ræða en drengurinn reiddist heiftarlega þegar stúlkan neitaði að deila tónlistarspilaranum með honum. Ef drengurinn verður fundinn sekur um morð á hann yfir höfði sér allt að tíu ára vistun í unglingafangelsi

„Við fyllumst alltaf áhyggjum þegar nemendur mæta með slík tæki í skólann,“ segir Tanmay Ghosh, skólastjóri skólans sem börnin eru nemendur í. Ghosh segir að börnin hafi ítrekað verið send heim með miða þar sem óskað er eftir því að þau taki ekki iPod tónlistarspilara eða farsíma með í skólann.