Yfir 1500 konur, allar HIV-smitaðar, stóðu fyrir mótmælagöngu í Mbabane, höfuðborg Svasílands en mikil reiði ríkir í landinu eftir að það fréttist, að átta af þrettán eiginkonum konungs landsins fóru í leiguflugi til útlanda í verslunarferð. Mikil fátækt er í landinu og meira en 40% fullorðinna eru með HIV-veiruna.

Konurnar, sem voru klæddar í marglita stuttermaboli, gengu í gegnum höfuðborgina og héldi á spjöldum þar sem stóð m.a: Við viljum fjölflokka lýðræði, Nú er komið nóg, og Skattgreiðendur, kóngafólk á ekki peningana.

Talsmaður kvennanna sagði, að þær vildu með aðgerðunum koma því á framfæri, að HIV-smituðu fólki líkaði ekki hvernig opinberu fé væri varið í Svasílandi. 

Átta konur kóngsins, börn þeirra, þjónustustúlkur og lífverðir, fóru frá Svasílandi í síðustu viku til Sviss til að kaupa inn fyrir mikla hátíð, sem haldin  verður í september til að fagna því að 40 ár eru liðin frá því Svasíland fékk sjálfstæði frá Bretlandi. Einnig á Mswati III konungur afmæli 6. september.

Talið er að þjóðartekjur á mann nemi um 85 þúsund krónum, þær lægstu í Afríku. Svasíland er eina konungsríkið í Afríku þar sem konungurinn er jafnframt einvaldur.