Reuters

Alþjóða Rauði krossinn vinnur nú að ítarlegu mati á þörfinni fyrir mannúðaraðstoð á átakasvæðum í Georgíu. Teymi sendifulltrúa er komið til Tskhinvali, höfuðborgar Suður-Ossetíu til að leggja mat á ástandið á svæðinu.

Þetta kemur fram á vef samtakanna.

„Megintilgangur farar minnar var að tryggja Alþjóða Rauða krossinum aðgang að Suður-Ossetíu. Við höfum upplýsingar um að mikil neyð ríki á átakasvæðunum og það er brýnt að brugðist sé við þörfum fólks sem skjótast,” sagði formaður Alþjóðaráðs Rauða krossins, Jakob Kellenberger, en hann er nýkominn aftur úr þriggja daga ferð til Georgíu og Rússlands.

Í samtali við Sergei Lavrov utanríkisráðherra Rússlands í Moskvu á þriðjudaginn var formanninum tjáð að Alþjóða Rauði krossinn hefði fullan stuðning Rússlands í viðleitni sinni til að veita neyðaraðstoð í Suður-Ossetíu.

Samkvæmt upplýsingum Rauða krossins þurfa margir af íbúum Suður-Ossetíu á mannúðaraðstoð og vernd að halda. „Starfsmenn Rauða krossins munu leggja mat á þarfir þeirra sem þurft hafa að flýja heimili sín og einnig verður gerð úttekt á ástandi heilbrigðisstofnanna. Við leggjum einnig mikla áherslu á að sameina fjölskyldur sem hafa sundrast og orðið viðskila vegna átakanna og leitum að fólki sem hefur horfið, “ sagði Kellenberger.

„Þá munum við reyna að fá aðgang að öllum þeim sem hafa verið teknir höndum eða eru í varðhaldi vegna átakanna til að hægt sé að leggja mat á þá meðferð sem þeir fá og þau lífsskilyrði sem þeir þurfa að búa við.” Formaðurinn bætti því við að Alþjóða Rauði krossinn hafi náið samráð við yfirvöld allra stríðandi fylkinga um skipulag og samhæfingu aðstoðarinnar.

Í Georgíu hefur Rauði krossinn veitt þúsundum flóttamanna hjálp og stutt við heilbrigðisþjónustu um allt land. Á undanförnum vikum hafa verið flutt rúmlega 430 tonn af mat og öðrum hjálpargögnum til Georgíu sem hluta af mannúðaraðstoð við allt að 25.000 flóttamenn.