Hluti Yongbyon kjarnorkuversins var jafnaður við jörðu í júní sl. eftir að samkomulag náðist milli ríkjanna sex í kjarnorkudeilunni við N-Kóreu. Reuters

Stjórnvöld í Norður-Kóreu segjast hafa stöðvað vinnu við niðurrif kjarnorkuvera í landinu, en þau saka Bandaríkin um að hafa gengið á bak orða sinna. Þau segja að bandarísk stjórnvöld hafi ekki tekið nafn N-Kóreu af lista yfir hryðjuverkaríki, sem sé þvert á það samkomulag sem hafi náðst.

Vinnan var stöðvuð 14. ágúst sl. að sögn talsmanns n-kóreska utanríkisráðuneytisins.

Fram kemur á fréttavef breska ríkisútvarpsins að stjórnvöld í Norður-Kóreu hafi stöðvað framkvæmdir þar sem Bandaríkin hafi ekki fjarlægt nafn landsins af lista yfir ríki sem styðja hryðjuverk. Bandaríkin vilja hins vegar að stjórnvöld í N-Kóreu samþykki mun strangari skilyrði - en þau hafa hingað til gert - áður en þau verða tekin af umræddum lista.

Eftir miklar tafir afhentu yfirvöld í Norður-Kóreu loks lista yfir kjarnorkuver í landinu á fundi sex ríkja í júní sl. Þau áttu von á því að nafnið yrði tekið af listanum í framhaldinu.

Það á hins vegar enn eftir að gerast en ríkin sex, þ.e. Norður- og Suður-Kórea, Japan, Bandaríkin, Rússland og Kína, hafa ekki enn náð samkomulagi hvernig staðfesta megi yfirlýsingu Norður-Kóreumanna.

Þeir hafa hótað að hefja starfsemi í Yongbyon-kjarnorkuverinu á nýjan leik verði ekki orðið við kröfu þeirra.