Björgunarmenn vinna nú hörðum höndum að því að grafa eftir eftirlifendum í norður Kína eftir að aurskriða varð þar 56 manns að bana hið minnsta. Vonir um að fólk finnist enn á lífi fara dvínandi.

Skriða féll á mánudag í dal í Xiangfen sýslu. Þrjátíu og fimm slösuðust og ekki er vitað um hversu margir festust undir skriðunni.

Skrifstofubygging, markaður og nokkur hús hrundu þegar hraðskreið skriðan skall á þeim en hún var samsett af leðju og námaúrgangi. Hún var nokkrir metrar á hæð og 600 metra breið.

Búið er að leita í um 70 prósent skriðunnar.

Fólk fannst á lífi á fyrsta og öðrum degi en nú er talið ólíklegt að einhver sé þar á lífi.

Um tvö þúsund manns vinna nú að björgunarstörfum við erfið skilyrði. Þar er leðja, fjarskipti eru léleg og stöðug rigning.