Ísraelska lögreglan telur sig hafa fundið lík franskrar stúlku sem talið er að ísraelskur afi hennar hafi myrt og varpað líkinu í á í nágrenni Tel Aviv. Samkvæmt upplýsingum frá lögreglu fannst barnsík í tösku í ánni og miðað við lýsingar afans þá er líkið af stúlkunni.

Afinn, sem býr með móður stúlkunnar, fyrrum tengdadóttur sinni, viðurkenndi þegar hann var handtekinn að hafa myrt stúlkuna. Afinn, Ronie Ron, viðurkenndi fyrir lögreglu að hafa barið stúlkuna, sem var fjögurra ára að aldri, til bana og síðan sett líkið í rauða ferðatösku sem hann varpaði í Yarkon ána. Hann dró síðar játninguna til baka.

Ron, sem er 45 ára að aldri, býr í nágrenni Tel Aviv með Marie-Charlotte Renaud, 23 ára. Hún er frönsk og var áður gift Benjamin Ron, syni Ronie Ron og er Benjamin faðir litlu stúlkunnar. Afinn og sambýliskonan hafa bæði verið úrskurðuð í gæsluvarðhald vegna málsins. Ekki var tilkynnt um hvarf stúlkunnar fyrr en í júlí en talið er að hún hafi verið myrt í maí.