Farþegar XL Leisure Group á Larnaca flugvelli á Kýpur í gær. AP

Unnið er að því að koma 85.000 ferðamönnum, sem eru strandaglópar eftir gjaldþrot breska fyrirtækisins XL Leisure Group, til síns heima. Mikil reiði ríkir á meðal ferðafólksins og einnig þeirra sem bókað hafa ferðir með fyrirtækinu og jafnvel greitt þær að fullu. Þetta kemur fram á fréttavef Sky. 

Talið er að allt að 200.000 manns hafi fjárfest í ferðum fyrirtækisins sem ekki verða farnar en tekið var við bókunum fram eftir morgni í gær. Gjaldþrot fyrirtækisins var síðan tilkynnt um klukkan þrjú að staðartíma.

50.000 manns voru þá í pakkaferðum á vegum fyrirtækisins, 10.000 manns voru erlendis með farmiða frá fyrirtækinu og 25.000 voru erlendis á vegum annarra fyrirtækja sem keypt höfðu flug af fyrirtækinu.

Flugmálayfirvöld í Bretlandi hafa heitið því að koma fólkinu til síns heima og er nú unnið að því að fá flugvélar til þess verks. Þá er talið líklegt að margir þeirra sem keypt hafa ferðir muni fá þær endurgreiddar áður en fyrirtækið verður gert upp.

Talsmaður flugmálayfirvalda beindi því til farþega í dag að reyna að fara ekki á taugum en samkvæmt lögum ber yfirvöldum að koma þeim sem eru í pakkaferðum, þegar ferðaskrifstofur fara á hausinn, heim. Stefnt er að því að eftir helgina geti sem flestir flogið heim, á þeim degi sem til stóð, eða degi síðar.