Jóannes Eidesgaard.

Jóannes Eidesgaard, lögmaður Færeyja og leiðtogi Jafnaðarflokksins, hefur slitið stjórnarsamstarfinu við Þjóðveldið, flokk Högna Hoydals en flokkarnir tveir mynduðu stjórn ásamt Miðflokknum eftir kosningar til færeyska lögþingsins í febrúar. Trúnaðarbrestur hefur orðið milli þeirra Jóannesar og Högna.

Fram kemur á fréttavef blaðsins Sósíalsins, að Eidesgaard hafi í dag vikið ráðherrum Þjóðveldisins, þeim Högna, sem verið hefur utanríkisráðherra,  Bjørt Samuelsen, Torbjørn Jacobsen, og Óluvu Klettskarð úr landsstjórninni. 

Á fréttavef færeyska útvarpsins sakar Eidesgaard Högna um að hafa reynt að grafa undan valdi sínu sem lögmaður með ýmsum yfirlýsingum og aðgerðum. Svo virðist sem uppúr hafi soðið í síðustu viku vegna deilna milli Jóannesar og Högna um afnot af skrifstofu í Tinganesi þar sem færeysku stjórnarskrifstofurnar eru til húsa.

Um er að ræða skrifstofu, sem embætti lögmanns hefur notað en Högni vildi að utanríkisráðuneytið fengi til afnota. Fram kom í færeyskum fjölmiðlum, að Högni hefði í tvígang fengið lásasmið til að opna skrifstofuna þegar hann kom að henni læstri.

Á fréttavef Dimmalætting segir, að ýmis mál hafi verið erfið innan landsstjórnarinnar í sumar, þar á meðal deilur um forgangsröðun jarðganga, deilur um sóknardaga í fiskveiðistjórnunarkerfinu og átök um formennsku í nefndum lögþingsins. Skrifstofumálið hafi síðan verið dropinn, sem fyllti mælinn.

Óvíst er um framhaldið en líklegt er talið að Eidesgaard reyni að mynda nýja landsstjórn með einhverjum þeirra flokka, sem áður voru í stjórnarandstöðu en hann hefur rétt til þess á meðan hann segir ekki af sér sem lögmaður.