George Bush, forseti Bandaríkjanna, segir að árásin á bandaríska sendiráðið í höfuðborg Jemen, Sanaa,  sé áminning um það að Bandaríkin séu í stríði við öfgahópa.

Bush hefur einnig sagt að árásin sé tilraun öfgamanna til að flæma Bandaríkjamenn frá Mið-Austurlöndum.

Árásarmenn vopnaðir sjálfvirkum byssum og sprengjuvörpum réðust á sendiráðið. Auk þess sprakk að minnsta kosti ein sjálfsmorðsbílsprengja.

Sextán manns létu lífið, þar af sex af árásarmönnunum. Enginn Bandaríkjamaður særðist.

„Þessi árás minnir okkur á að við erum í stríði við öfgamenn sem eru tilbúnir að myrða saklaust fólk í því skyni að ná fram markmiðum sínum,“ sagði Bush þegar hann hitti David Petraeus, fyrrverandi yfirmann í Írak.

„Eitt markmið þessara öfgahópa þegar þeir drepa er að reyna  að láta okkur Bandaríkjamenn fara á taugum og draga okkur í hlé frá þessum svæðum í heiminum.  Okkar skilaboð eru að við viljum hjálpa yfirvöldum að komast lifandi frá öfgamönnum, við viljum að fólk geti lifað eðlilegu lífi,“ sagði Bandaríkjaforseti.

„Við viljum að mæður geti alið upp syni sína og dætur í friðsamlegu umhverfi svo að þeir geti uppfyllt drauma sína í betri heimi,“ sagði Bush.