Þorvaldur Örn Kristmundsson

Skortur á skuggaefni veldur áhyggjum í Danmörku. Frá þessu er greint í danska dagblaðinu Berlingske Tidende í dag.

Skuggaefnið, sem er geislavirkt, er notað til skönnunar til þess að greina og ákvarða næstu skref meðferðar hjá hjartasjúklingum annars vegar og krabbameinssjúklingum hins vegar. Efnið er notað til rannsóknar á meira en hundraðþúsund Dönum á ári hverju.

Skorturinn á efninu mun nú leiða til þess að læknar þurfa að meta hvaða sjúklingar komist hjá því að fara í skönnun og fá í staðinn annars konar meðferð. 

Eftir því sem fram kemur í Berlingske er ástæða skortsins á skuggaefninu sú að þær þrjár verksmiðjur sem undir venjulegum kringumstæðum útvega efnið hafa þurft að loka á sama tíma. Þannig eru kjarnaofnarnir tveir í annars vegar Frakklandi og Belgíu lokaðir vegna nauðsynlegs viðhalds meðan kjarnaofninn í Hollandi er lokaður vegna ófyrirséðra bilana, en loftbólur fundust í kælivökva kjarnaofnsins. 

Liselotte Højgaard, fulltrúi danska heilbrigðisráðuneytisins í samstarfi Evrópusambandslanda á sviði heilbrigðismála ákvað eftir fund með danska heilbrigðisráðherranum að setja af stað símakeðju milli Evrópusambandslandanna til þess að leita lausna á vandanum. Slík símakeðja er venjulega aðeins notuð þegar samhæfa þarf aðgerðir landanna gegn aðsteðjandi hættulegum smitsjúkdómum. 

„Fulltrúar allra Evrópulandanna eru sammála um að við lítum þetta alvarlegum augum, en þetta er þó engin krísa,“segir Højgaard.

Samkvæmt því sem fram kemur í Berlingske telja menn hinn aðsteðjandi skort á skuggaefni gefa tilefni til þess að skoða, hvort heldur er á vettvangi Evrópusambandsins eða WHO (Alþjóða heilbrigðisstofnunar Sameinuðu þjóðanna), hvernig birgðastaða skuggaefnisins til heilbrigðisnota verður sem best tryggður.