Yfirvöld í Singapúr hafa ákveðið að banna sölu á kínverskum mjólkurafurðum eftir að rannsóknir undanfarna daga hafi leitt í ljós að fjölmargar kínverskar mjólkurafurðir innihalda hættulegt aukaefni.

Samkvæmt upplýsingum frá Matvæla- og landbúnaðareftirliti Singapúr fundust leifar af melamín í jógúrt og drykkjarjógúrt frá tveimur kínverskum framleiðendum. Því hafi verið ákveðið að innkalla vöruna og banna um leið sölu á kínverskum mjólkurvörum í Singapúr. Jafnframt hafa innlendir matvælaframleiðendur verið varaðir við því að nota mjólkurvörur frá Kína í framleiðslu sína.

Fjögur börn hafa veikst eftir neyslu á mengaðri þurrmjólk í Kína og yfir 6.200 hafa veikst.  Talið er að eitrunin stafi af því að kínverskir framleiðendur hafi blandað efninu melamin í fóður en það hefur þau áhrif, að við mælingu virðist próteininnihald þess vera meira en það er í raun.

Melamin er lífrænt efni, sem notað er í iðnaði, til dæmis til að framleiða hart og óbrjótanlegt plast og einnig lím. Er það mjög köfnunarefnisríkt en köfnunarefni í fóðri þykir gefa góða vísbendingu um próteininnihald þess.

Undanfarna daga hafa kínverskir foreldra flykkst á heilsugæslustöðvar og sjúkrahús til þess að láta rannsaka börn sín af ótta við að þau kunni að veikjast vegna neyslu mjólkurafurða.