Tzipi Livni, utanríkisráðherra Ísraels og nýr leiðtogi Kadima flokksins, mun að öllum líkindum fá umboð til formlegra stjórnmyndunarviðræðna í dag en Simon Peres, forseti landsins, féllst á afsögn Ehud Olmert, fyrrum leiðtogi flokksins og forsætisráðherra, í gær. Þetta kemur fram á fréttavef Ha’aretz. 

Livni átti óformlegan fund með Ehud Barak formanni Verkamannaflokksins, í gærkvöldi og segja aðstoðarmenn hennar fundinn hafa verið góðan. Áður hafði Benjamin Netanyahu, leiðtogi Likud flokksins, staðhæft að Barak hafi lýst áhuga á samstarfi við Likud-flokkinn um myndun nýrrar stjórnar.

Er Livni sögð hafa boðið Barak samstarf á algerum jafnréttisgrundvelli en í stjórn Olmerts var Kadima flokkurinn leiðandi. Þá er talið að Verkamannaflokkurinn muni m.a. setja það skilyrði fyrir áframhaldandi samstarfi við Kadima að Daniel Friedmann, dómsmálaráðherra Kadima láti af því embætti en hugmyndir hans um breytingar á dómskerfinu hafa verið mjög umdeildar í Ísrael.

Einnig er talið að Verkamannaflokkurinn muni krefjast nokkurra breytinga á nýsamþykktu fjárlagafrumvarpi og yfirlýsingar um að ný stjórn muni a.m.k. sitja í eitt og hálft ár.  

Livni og Barak hafa oft tekist harkalega á í stjórnmálaumræðum. Aðstoðarmenn hennar segja hana hins vegar tilbúna til að leggja sig alla fram við að ná samkomulagi við Barak þar sem hún telji hann bera velferð þjóðarinnar fyrir brjósti.

Stjórn Olmerts mun sitja áfram þar til ný stjórn hefur verið mynduð.