Að minnsta kosti tólf ríki hafa bannað innflutning á kínverskum mjólkurafurðum vegna hneykslismáls sem skekur kínverskan mjólkuriðnað. Fjögur kínversk börn hafa látist eftir neyslu á mjólk sem er menguð af aukaefninu melamín. Þúsundir hafa veikst eftir neyslu mjólkurafurða.

Í fyrstu var talið að melamínið væri einungis að finna í þurrmjólkurdufti en nú hefur komið í ljós að það finnst í kúamjólk, ís, jógúrt, kökum og sælgæti.

Óttaslegnir foreldrar hafa farið með börn sín í skoðun á sjúkrahús og heilsugæslustöðvar til þess að láta kanna hvort þau hafi sýkst en melamín, sem oft er notað í plast og aðrar iðnaðarvöru, getur valdið nýrabilun. 54 þúsund börn hafa veikst í Kína undanfarnar vikur vegna neyslu mjólkurafurða. Hafa börn veikst á fleiri stöðum heldur en á meginlandi Kína, til að mynda í Hong Kong og Macau.

Hafa foreldrar barna sem hafa veikst eftir neyslu mjólkurafurða tekið sig saman um að krefjast bóta vegna þessa.

Evrópusambandið hefur hvatt til þess að ríki sambandsins láti rannsaka innihald brauð og súkkulaðis til þess að tryggja að ekki finnist leifar af mengaðri mjólk í matvælum.En það eru ekki einungis kínverskir mjólkurframleiðendur sem hafa fundið fyrir ótta almennings því alþjóðleg fyrirtæki eins og Kraft Foods hafa orðið fyrir barðinu á orðrómi um að mengaðar mjólkurafurðir séu notaðar í framleiðslu. Samkvæmt orðróminum á Kraft að hafa þurft að innkalla Oreo kexkökur og M&M sælgæti.

Leifar af melamín hafa fundist í vörum 22 kínverskra fyrirtækja, þar á meðal í vörum tveggja stærstu mjólkurfyrirtækja landsins.

Meðal ríkja sem hafa bannað innflutning á kínverskum mjólkurafurðum og matvælum sem innihalda mjólk frá Kína eru: Bangladess, Brúnei, Japan, Malasía, Filippseyjar, Singapúr, Taívan, Búrúndí, Kenýa og Indónesía.