Sjö dæmd fyrir morðtilraun

Sjö manns voru dæmd fyrir morðtilraun eftir að hafa misþyrmt 36 ára konu hrottalega í grennd við bæinn Mors á Jótlandi í fyrra. Konan fannst meðvitundarlaus og nakin á sveitavegi og síðar kom í ljós að sjömenningarnir höfðu valdið henni varanlegum heilaskaða.

Sjömenningarnir eru á aldrinum 17 til 45 ára og voru í morgun dæmdir sekir um morðtilraun í héraðsdómi í Viborg en refsing þeirra verður kunngjörð á mánudaginn kemur.

Konan fannst á malarvegi í september í fyrra. Var hún vart með lífsmarki og samkvæmt Berlingske Tidende var líkamshiti hennar kominn niður í 27 gráður er hún fannst.

Sjömenningarnir og fórnarlamb þeirra munu öll vera atvinnulausir fíkniefnaneytendur á framfæri bæjarfélagsins.

Konan sem lifði árásina af er í dag vistuð á elliheimili á Jótlandi. Hún getur ekki matast án aðstoðar og getur ekki tjáð sig eða haft nein samskipti við fólk og segja læknar ólíklegt að hún muni nokkurn tímann jafna sig til fulls.

• 1 blogg um fréttina

Bloggað um fréttina

• Jón Aðalsteinn Jónsson: Sanngjörn refsing