Lögregla í Nígeríu hefur stöðvað starfsemi einkasjúkrahúss í bænum Enugu þar sem grunur leikur á að nýfædd börn hafi verið seld mansali á sjúkrahúsinu. Lögregla fékk upplýsingar um starfsemi sjúkrahússins þegar sautján ára gamalli stúlku tókst að strjúka þaðan. Fjórir starfsmenn, tveir hjúkrunarfræðingar og stjórnendur sjúkrahússins, hafa verið handteknir í tengslum við málið.

Í áhlaupi lögreglu fundust sjö barnshafandi ungar stúlkur á sjúkrahúsinu og hefur þeim verið komið í umsjón opinberra aðila. Yfirmaður lögreglu í Nígeríu tjáði fréttamanni BBC að upp hafi komist um málið er stúlkunni, sem á von á barni innan nokkurra daga, tókst að flýja af sjúkrahúsinu. Hafði hún dvalið á sjúkrahúsinu um sex mánaða skeið.

Samkvæmt lögreglu voru börnin seld á 127 Bandaríkjadali til glæpamanna sem síðan seldu börnin í barnaþrælkun eða vændi. Fréttamaður BBC segir að málið sé ekkert einsdæmi í Nígeríu því fleiri slík mál hafi komið þar upp á undanförnum árum. Fátækar ungar stúlkur sem eru barnshafandi eiga fáa kosti ef þær eru ógiftar enda séu þær útskúfaðar af samfélaginu. Fóstureyðingar eru ólöglegar í Nígeríu nema í undantekningar tilvikum og stórhættulegt sé að fara í ólöglega fóstureyðingu í Nígeríu.