Cindy McCain, eiginkona John McCain forsetaefnis bandarískra repúblíkana, hefur sakað þá sem standa á bak við kosningabaráttu Baracks Obama forsetaefni demókrata,  um að heyja ómerkilegustu kosningabaráttu sem sögur fara af. Þetta kemur fram á fréttavef Jyllands-Posten.

Hafa ummæli hennar, sem biortust í blaðaviðtali, vakið mikla athygli í ljósi þess að McCain hefur fram til þessa haldið sig mjög til hlés í kosningabaráttu eiginmanns síns.

Áður hafa stuðningsmenn Obama sett fram sams konar ásakanir á hendur stuðningsmanna McCain.McCain, sýndi fyrst nýja hlið á sér á kosningafundi í Pennsylvaniu fyrr í þessari viku. Þar greindi hún frá því hversu stolt hún væri af því að sonur sinn hefði sinnt herþjónustu í Írak og bætti síðan við: „Ég get sagt ykkur það að ég fékk hroll um allan líkamann daginn sem Obama öldungadeildarþingmaður greiddi atkvæði gegn því að fjármagna son minn, sem var í þjónustu við föðurlandið.”

Vísaði hún þar til atkvæðagreiðslu árið 2007 en Obama var þá í hópi fimmtánþingmanna sem greiddu atkvæði gegn lagafrumvarpi þar sem kveðið var á um aukafjárveitingu til hernaðarins í Írak þar sem ekki hafi verið orðið við kröfum þeirra um að tímasetja brottflutning Bandaríkjahers frá landinu.

 Obama hefur stutt öll önnur frumvörp um fjárveitingar til Bandaríkjahers frá því hann tók sæti í öldungadeildinni í janúar árið 2005.

Tveimur mánuðum eftir umrædda atkvæðagreiðslu greiddi McCain atkvæði gegn lögum um aðra aukafjárveitingu á þeirri forsendu að í þeim væri settur tímarammi fyrir brottflutning herliðsins.