Tzipi Livni, utanríkisráðherra Ísraels og leiðtogi Kadima flokksins, með Shimon Lankri, borgarstjóra Acre, í norðurhluta landsins. AP

Samkomulag um myndun nýrrar stjórnar Kadima flokksin og Verkamannaflokksins, undir forystu Tzipi Livni, er nú sagt skammt undan í Ísrael. Mun hafa miðað mjög hratt í samkomulagsátt á fundi Livni og Ehud Barak, varnarmálaráðherra og formanns Verkamannaflokksins í gær. Þetta kemur fram á fréttavef Ha’aretz. 

Enn mun þó stranda á þeirri kröfu Baraks að völd Daniels Friedmann dómsmálaráðherra verði takmörkuð.

Þá eru forsvarsmenn Verkammaflokksins sagðir hafa áhyggjur af því að Shas flokkurinn komi ekki að stjórninni, en hann átti aðild að fyrri stjórn Kadima og Verkamannaflokksins, undir forystu Ehud Olmerts, fráfarandi forsætisráðherra. Munu  forsvarsmenn Shas hvorki hafa sagt af eða á um hugsanlega þátttöku í stjórnarsamstarfinu.

Eli Yishai, leiðtogi Shas og iðnaðar, verslunar og atvinnumálaráðherra Ísraels, hefur sett það sem skilyrði fyrir þátttöku í stjórnarsamstarfi undir forystu Livni að ekki verði rætt um skiptingu Jerúsalem í samningaviðræðum við Palestínumenn.