Nokkur hundruð óánægðra verkamanna frá Kína hafa tekið tólf ísraelska starfsmenn byggingafyrirtækis til fanga á á lítilli óbyggðri eyju í Atlantshafi. Starfsmennirnir voru að reisa hótel á eyjunni sem tilheyrir Turks og Caicos-eyjum sem eru breskt yfirráðasvæði í grennd við Bahamas-eyjar í Karabískahafinu.

Enginn flugvöllur er á eyjunni og hafa verkamennirnir lokað einu höfninni. Samkvæmt einum Ísraelanna sem Ynet fréttavefurinn náði tali af þá lenti byggingarverktakinn í greiðsluerfiðleikum og voru áformin um lúxus-hótel og ferðamannaþjónustu á eyjunni lögð á ís þegar einn af hinum bandarísku bönkum sem fjármagna verkefnið var tekinn til gjaldþrotaskipta.

„Við sögðum verkamönnunum að búið væri að stöðva framkvæmdina og að við værum að reyna að leysa fjármálavandann. Þeir vilja snúa aftur til Kína og hafa farið fram á bætur," sagði Ísraelinn sem einungis var nefndur Motta í frétt Ynet.