Barack Obama, forsetaframbjóðandi bandarískra demókrata, hefur varað við því að miklar líkur séu á að keppinautur hans John McCain, forsetaefni repúblíkana, stefni þjóðaröryggi Bandaríkjanna í hættu verði hann næsti forseti landsins. Þetta kemur fram á fréttavef BBC. 

Obama segir að næsti forseti Bandaríkjanna muni standa frammi fyrir prófraunum í öryggismálum vegna „slæmrar stefnu” George W. Bush, forseta Bandaríkjanna, í utanríkismálum og að mccain sé ekki rétti maðurinn til að takast á við þær. 

Joe Biden, varaforsetaefni Obama, sagði um helgina að Obama muni þurfa að takast á við  mikinn vanda á alþjóðavettvangi innan sex mánaða frá því hann tekur við embætti. Í kjölfarið lýsti McCain því yfir að ummælin væru sönnun þess að áhættusamt væri fyrir þjóðina að velja Obama sem næsta forseta sinn.

Obama sagði er ummælin voru borin undir hann að Biden hefði tilhneigingu til að ræða hlutina hugmyndafræðilega með miklum tilþrifum. „Það sem hann átti við var það að ný ríkisstjórn muni standa frammi fyrir prófraunum, sama hver sú ríkisstjórn er,” sagði hann. „Spurningin er sú hvort ný ríkisstjórn muni stýra Bandaríkjunum í nýja átt, með því að senda skýr skilaboð til umheimsins að við séum ekki lengur með yfirgang og einstrengingshátt og innantóma hugmyndafræði.”