Tzipi Livni, utanríkisráðherra Ísraels og nýr formaður Kadima flokksins, er sögð hafa tilkynnt formönnum þeirra flokka sem hún hefur átt í stjórnarmyndunarviðræðum við að hún muni boða til kosninga á sunnudag liggi samkomulag um myndun nýrrar stjórnar ekki fyrir fyrir þann tíma. Þetta kemur fram á fréttavef Ha’aretz. 

Viðræður á milli Livni og forsvarsmanna Shas flokksins virðast nú við það að renna út í sandinn  en forsvarsmenn Shas hafa sett stóraukin framlög til barnafjölskyldna sem skilyrði fyrir stjórnarþátttöku.

Shas hafnaði málamiðlunartilboði Livni í gærkvöldi en aðstoðarmenn hennar segja tilboðið hafa verið próf til að komast að því hvort flokkurinn hefði raunverulegan áhuga á stjórnasamstarfi eða væri að að draga viðræður á langinn með það að markmiði að knýja fram kosningar. 

Fyrir liggur grundvallarsamkomulag Kadima og Verkamannaflokksins um stjórnarsamstarf en stjórn þessara tveggja flokka hefði ekki meirihluta á þingi. Hugsanlegt er að Meretz flokkurinn og UTJ flokkurinn gangi til liðs við stjórn þeirra en án þátttöku  Shas hefði slík stjórn nauman meirihluta á ísraelska þinginu. 

Kadima, Verkamannaflokkurinn og Shas eiga aðild að starfandi ríkisstjórna Ehud Olmerts, forsætisráðherra Ísraels, en Olmert mun láta af störfum er ný ríkisstjórn hefur verið mynduð í landinu.