Yfir 3.600 börn eru enn á sjúkrahúsi í Kína eftir neyslu á mengaðri þurrmjólk, samkvæmt opinberum tölum. Af þeim eru þrjú í lífshættu en fjögur börn hafa látist í Kína vegna neyslu á mengaðri mjólk. Alls hafa 46.717 börn verið útskrifuð eftir að hafa veikst vegna neyslu mengaðrar mjólkur. Iðnaðarefninu Melamin, sem aðallega er notað við plastframleiðslu, var blandað í þurrmjólkurduftið til þess að auka próteinmagn þess.

Í skýrslu sem birt var á vef kínverska heilbrigðisráðuneytisins í gær kemur fram að börnin létust á tímabilinu maí-ágúst sem var áður en greint var frá því opinberlega að eiturefni væri að finna í mjólkurdufti.

Melamín getur valdið nýrabilun í fólki og dregið ung börn til dauða. Frá því greint var frá því opinberlega í september að melamín hefði fundist í kínverskum mjólkurvörum. Mikil reiði braust út hjá kínverskum almenningi enda höfðu stjórnvöld þagað um málið svo mánuðum skipti. Innkalla þurfti mjólkurvörur frá fjölda framleiðenda þar sem rannsóknir leiddu í ljós að melamín var að finna í vörum þeirra.