Vladimir Pútín, forsætisráðherra Rússlands, á leiðtogafundi CIS í Moldóvu í morgun. AP

Lagafrumvarp þar sem kveðið er á um að kjörtímabil forseta Rússlands verði lengt úr fjórum árum í sex ár, var samþykkt í neðri deild rússneska þingsins í morgun með 388 atkvæðum gegn 58. Talið er að frumvarpið verði afreitt sem lög innan tíðar þar sem stjórnarflokkur Dmitry Medvedev forseta og Vladimirs Putin forsætisráðherra hefur hreinan meirihluta í báðum deildum þingsins. Þetta kemur fram á fréttavef CNN.

Vangaveltur hafa verið uppi um það að lagabreytingunni sé ætlað að gera Pútín mögulegt að bjóða sig fram til embættis forseta á ný árið 2012 og sitja þá í tólf ár. Hann hefur þegar verið forseti landsins í átta ár en samkvæmt núgildandi lögum er honum ekki heimilt að sitja lengur í embætti en það.

Andstæðingar frumvarpsins segja það veita forseta, sem þegar hafi of mikil völd og of lítið aðhald, enn meiri völd og frjálsræði. Einn þeirra Gennady  Zyuganov segir breytinguna fela forsetanum völd sem jafnist á við samanlögð völd aðalritara sovéska kommúnistaflokksins, Rússlandskeisara og hins egypska faraós.  

Pútín segir breytinguna hins vegar styrkja lýðræðið í landinu.