Kanslari Þýskalands, Angela Merkel, sagðist heldur hissa á viðvörunum George W. Bush Bandaríkjaforseta til ríkja um að þau þrengdu ekki um of að regluverki bankanna.

Merkel er á leið til Washington til fundar við fulltrúa tuttugu ríkja heims. Þar á að ræða efnahagsástandið. Hún undraðist orð forsetans, þar sem að böndum hefði ekki verið komið á vandann.

Bush sagði að ekki mætti kæfa efnahaga heimsbyggðarinnar með stífum nýjum fjármálareglugerðum.

Merkel vísaði ekki beint í ummæli Bush, heldur sagði rösklega spurð hvað henni fyndist um orð um of mikla stjórnun.

„Ég verð að segja að ég er svolítið hissa þegar varnaðarorðin heyrast svo stuttu eftir efnahagsskellinn - Honum er ekki lokið,“ sagði hún við fréttamenn.

Merkel sagði að ríkisstjórn hennar yrði mjög ánægð þegar hún næði að losna undan eignarhaldi á bönkunum. Þar vísaði hún í að þýsk yfirvöld hafa lagt fimm hundruð milljónir evra í lausafé fyrir banka í vanda í stað eignarhluts. Hún sagði að Þýskaland myndi setja reglugerðir til að hindra að svona staða kæmi aftur upp.

Á fundinum í Washington á að ræða leiðir til að létta á efnahagskreppuni og ræða hvernig megi koma í veg fyrir að hún dúkki aftur upp síðar.

„Ég fer bjartsýn til Washington,“ sagði Merkel við AP. „Ég tel að vegna kreppunnar sé þrýstingur á að við framkvæmum í takt við orð okkar og að við sýnum að við lærum af ástandinu.“