Þúsundir íbúa úthverfa Los Angeles hafa þurft að flýja heimili sín undan skógareldum sem loga norðan við borgina. Hafa hundruð húsa brunnið í San Fernandodalnum. Slökkviliðsmenn ráða ekki við eldana en heitir vindar, svonefndir Santa Ana vindar, hafa nært þá.

Þá hefur enn ekki tekist að slökkva skógareld, sem brunnið hefur við bæinn Montecito frá því á föstudag.  Arnold Schwarzenegger, ríkisstjóri hefur lýst yfir neyðarástandi í Los Angeles og  Santa Barbara.

Antonio Villaraigosa, borgarstjóri Los Angeles, segir að rafmagnslínur hafi fallið vegna eldanna og hætta sé á víðtæku rafmagnsleysi. Hefur hann hvatt fólk, sem býr á svæðinu þar sem eldarnir loga, til að bíða ekki átekta heldur flýja strax. 

Ekki er vitað að neinn hafi látið lífið vegna eldanna en William Bratton, lögreglustjóri Los Angeles, sagðist óttast, að lík myndu finnast í  Oakridge hjólhýsagarðinum þar sem um 500 hjólhýsi brunnu í fyrrinótt.