Arnold Schwarzenegger, ríkisstjóri Kaliforníu, hefur lýst yfir neyðarástandi í þremur sýslum ríkisins vegna skógarelda, Los Angeles, Orange og Santa Barbara. Hundruð heimila hafa brunnið og þúsundir íbúa haf flúið eldhaf og reykjarkóf.

Eldarnir kviknuðu á fimmtudagskvöld í hverfi stórstjarnanna í Montecito. Eldarnir hafa breiðst hratt út og hafa yfir 800 heimili brunnið, hús, íbúðir og húsvagnar. Að minnsta kosti 10 þúsund manns hafa flúið undan eldunum. Enginn hefur farist en að minnsta kosti 13 íbúar hafa leitað á sjúkrahús vegna brunasára og reykeitrana. Þá hafa sex slökkviliðsmenn slasast við slökkvistarfið.

Sterkir vindar hafa torveldað slökkvistarf og um tíma var ekki hægt að nota þyrlur til slökkvistarfa. Heldur hefur dregið úr vindi en sáralítill raki er á svæðinu og heitt í veðri. Ólíklegt er því talið að hægt verði að slökkva eldana á næstunni.