Sjö manns biðu bana þegar flugvél hrapaði á afskekktri eyju í Bresku Kólumbíu í Kanada í gær. Kraftaverk þykir að áttundi maðurinn skuli hafa komist lífs af, en þetta er í annað sinn á skömmum tíma sem vél af sömu gerð hrapar í Kanada.

Flugmaður vélarinnar, sem var af gerðinni Grumman Goose, er í hópi hinna látnu, en átti marga flugtíma að baki. 

Maðurinn sem komst lífs af sagði björgunarmönnum að hann hefði náð að klöngrast úr flakinu áður en vélin varð alelda. Hann er með töluverð brunasár og er líðan hans eftir atvikum.

Vélin, sem er í flota flugvélagsins Pacific Coast, tók á loft frá alþjóðaflugvellinum í Vancouver.

Aðeins eru nokkrir mánuðir liðnir frá því að önnur Grumman Goose flugvél félagsins hrapaði í ágúst, með þeim afleiðingum að fimm fórust.