Sjóræningjar fara um borð í úkraínska skipið MV Faina. Reuters

Sádi-arabíska olíuskipið Sirius Star, sem sjóræningjar rændu úti fyrir strönd Kenýa á Indlandshafi á laugardag nálgast nú strönd Sómalíu. Mun skipið vera á leið til hafnar í Eyl en algengt er að sjóræningjar leggi þar að landi. Um borð í skipinu eru 2 milljónir olíutunna en skipið er stærsta skip sem nokkru sinni hefur fallið í hendur sjóræningja. Þetta kemur fram á fréttavef BBC. 

Fjölþjóðlegur floti er á svæðinu til að reyna að koma í veg fyrir sjórán sjóræningja frá Sómalíu  en sjaldgæft er að skipum sé rænt þetta langt frá ströndum Sómalíu. Þá kom það eftirlitsaðilum á svæðinu í opna skjöldu að sjóræningjar skyldu ráðast á þetta stórt skip.  

Mike Mullen, yfirmaður bandaríska flotans, segir sjóræningjana greinilega vel þjálfaða. „Hafi þeir náð að komast um borð er mjög erfitt að losna við þá, því þá hafa þeir augljóslega gísla," sagði hann er hann gerði grein fyrir málinu í bandaríska varnarmálaráðuneytinu Pentagon. 25 manna fjölþjóðleg áhöfn er um borð í skipinu. 

Eitt af hverjum þremur sjóránum í heiminum er framið við austurströnd Afríku og á Aden flóa. A.m.k. tólf skip, þeirra á meðal úkraínska flutningaskipið Faina, sem hlaðið er hergögnum, eru nú á valdi sjóræningja á svæðinu. Um 250 manns eru í áhöfnum þeirra.

Það sem af er þessum mánuði hefur skipum frá Japan, Kína og Tyrklandi verið rænt á svæðinu.