Aðstoðarmaður Moshe Ya'alon, fyrrum yfirmanns ísraelska heraflans, hefur borið til baka fréttir ástralsks blaðs af því að Vesturöndin verði að skoða allar leiðir til að stöðva kjarnorkuáætlun Írana, þeirra á meðal að ráða Mahmoud Ahmadinejad Íransforseta af dögum. Þetta kemur fram á fréttavef Ha'aretz.

Aðstoðarmaðurinn segir Ya'alon hafa sagt að reyna ætti til þrautar að stöðva írönsk yfirvöld með efnahagslegum og pólitískum aðferðum og að einungis eigi að grípa til hernaðarlegra aðgerða skili þær ekki árangri. Þá segir hann ummæli hans um hugsanlega aftöku foretans hafa verið tekin úr samhengi.

Haft er eftir Ya'alon í ástralska blaðinu The Sydney Morning Herald í dag:  „Við verum þegar í stað að takast á við írönsku byltinguna. Það er ómögulegt að koma á stöðugleika í Miðausturlöndum án þess að brjóta írönsk stjórnvöld á bak aftur. Það verður að koma í veg fyrir  kjarnorkuáætlun Írana.”

Þá segir hann nauðsynlegt að íhuga hvort ráða beri Ahmadinejad af dögum og að yfirvöld í Egyptalandi, Sádi-Arabíu, Jórdaníu og ríkjunum við Persaflóa muni fagna því verði árás gerð á Íran. „Það er misskilningur að líta svo á að deilur Ísraela og Araba séu þær sem skipti mestu í Miðausturlöndum,” segir hann. „Spennan á milli sjíta og súnníta ristir mun dýpra, spennan á milli Persa og Araba ristir mun dýpra, átökin á milli þjóðstjórnanna og herskárra afla eru af mun dýpri rótum.”