Bresk átján ára gömul stúlka sem á von á tvíburum síðar í vikunni verður yngst breskra kvenna til þess að fæða tvíbura sem eru samvaxnir að hluta. Stúlkan, Laura Williams og eiginmaður hennar, sem er 28 ára gamall, eiga fyrir átján mánaða gamla dóttur. Þrátt fyrir að hafa verið ráðlagt að fara í fóstureyðingu snemma á meðgöngunni var Williams alltaf ákveðin í að eignast tvíburana.

Tvíburarnir, stúlkubörn, verða tekin með keisaraskurði síðar í vikunni og hafa foreldrarnir þegar ákveðið nöfn þeirra: Faith og Hope.  Samkvæmt frétt á vef Independent í dag kemur fram að þær eru samvaxnar frá bringubeini að nafla en eru með sitthvort hjartað. Segir Williams að læknar hafi sagt þeim að það séu meiri líkur en minni að það takist að bjarga lífi þeirra. Ef það er einungis maginn sem er sameiginlegur þá eigi þær góðan möguleika.

Hann segir að ekki sé hægt að lýsa því sem þau hjónin eru að ganga í gegnum. Williams segir að hann hafi rætt við bandarískan sérfræðing og sá hafi aldrei heyrt þess getið að jafn ung kona gangi með samvaxna tvíbura og hann telji að þetta sé í fyrsta skipti í sögunni sem slíkt gerist.

Þegar Williams, sem er komin 35 vikur á leið, fór í tólf vikna sónar kom í ljós að tvíburarnir væri samvaxnir og var þeim neitað um að sjá sónarmyndir af börnunum þar sem það var talið að það yrði of mikið áfall fyrir foreldrana.

Einungis 5% samvaxinna tvíbura lifa lengur en sólarhring og var Williams sagt að ef heppnin yrði með þeim og þau myndu lifa tvær vikur eða lengur þá gæti sú aukaverkun fylgt fæðingunni að hún myndi aldrei aftur geta eignast börn.