Kosið verður um aukna sjálfstjórn á Grænlandi á morgun. Talið er nær fullvíst að aukin sjálfstjórn verði samþykkt en stuðningsmenn aukinnar sjálfstjórnar óttast þó að  það muni skyggja á niðurstöðuna að margir muni greiða atkvæði gegn henni í mótmælaskyni við starfandi heimastjórn á Grænlandi. Þetta kemur fram á fréttavef Jyllands-Posten.

Heimastjórn hefur starfað á Grænlandi í þrjátíu ár en kosið verður um það á morgun hvort Grænlendingar vilji auka sjálfstæði sitt frá Dönum.

Grænlenska heimastjórnin hefur lagt mikla áherslu á aukna sjálfstjórn og óttast Juliane Henningsen þingmaður flokksins Inuit Ataqatigiit á danska þinginu, að óeining innan hennar  muni leiða til þess að margir, sem annars væru fylgjandi sjálfstjórn, greiði atkvæði gegn aukinni sjálfstjórn.

Tveir þingmenn Grænlendinga hafa sagt af sér þingmennsku á heimastjórnarþinginu í haust en átta þingmenn þess hafa sagt af sér á fjórum árum.„Það hafa verið mótmæli gegn Hans Enoksen, formanni grænlensku heimastjórnarinnar, og stjórn hans á þessu kjörtímabili. Ég óttast því að stór hluti kjósenda muni greiða atkvæði gegn sjálfstjórn í mótmælaskyni,” segir Henningsen.  

„Ég skil vel það óöryggi sem kjósendur finna fyrir. Átök innan heimastjórnarinnar eru ekki gæfumerki þegar kemur að kosningu um sjálfstjórn, sem myndi fela grænlenskum stjórnmálamönnum aukna ábyrgð. Ósætti er m.a. innan heimastjórnin um skattlagningu og fiskveiðimál.”

Verði aukin sjálfstjórn samþykkt í þjóðaratkvæðagreiðslunni munu Grænlendingar m.a. taka yfir stjórn lögreglu mála og landamæraeftirlits í landinu. Þá mun yfirstjórn nýtingar náttúruauðlinda, fjölskyldumála og útlendingaeftirlits færast alfarið til þeirra.