Þúsundir mótmælenda eru á flugvellinum. SUKREE SUKPLANG

Holberg Másson var einn talsmanna farþeganna á flugvellinum í Bangkok í morgun. Hann segir að farþegarnir, sem voru strandaglópar vegna þúsunda mótmælenda sem lokuðu flugvellinum, hafi hvorki fengið vott né þurrt í þær 18 klukkustundir sem þeir héldu til á flugvellinum, taílensk yfirvöld og starfsmenn flugvallarins hafi sýnt þeim lítinn áhuga.

„Um ellefuleytið í morgun vorum við sem ætluðum til London orðin óþreyjufull og fórum og báðum um að fá að tala við þá sem fóru fyrir mótmælunum. Ég og annar urðum talsmenn farþeganna og sögðum þetta ekki líðandi þar sem okkur væri haldið nauðugum. Mótmælendur sögðu ekki annað koma til greina. Ég sagði þá að þetta gengi ekki því við værum hreinlega gíslar. Mótmælendurnir urðu alveg brjálaðir yfir því að við teldum okkur gísla þar sem okkur væri frjálst að fara. En við bentum þeim á að það væri ekki svo auðvelt þar sem við værum föst og kæmumst hvergi,“ segir Holberg.  

„Þá var eins og viðmót þeirra breyttist og þeir lofuðu að reyna að gera eitthvað fyrir okkur og reyndu jafnframt að réttlæta aðgerðir sínar. Við reyndum að ná í flugvallaryfirvöld og um tvö leytið var tilkynnt að það kæmu rútur. Okkur var svo fylgt af lögreglunni út í um 100 rútur og erum nú á leiðinni á hótel í Pattaya sem er í um klukkutíma frá Bangkok þar sem við fáum vonandi eitthvað að borða,“ segir Holberg.  

Holberg var á leiðinni til London og kom á flugvöllinn í gærkvöldi. „Mér sagt að hætt hefði verið við að tékka fólk inn og að allir starfsmenn flugvallarins hefðu flúið eftir að mótmælendurnir komu hingað. Svo var okkur sagt að bíða en eftir miðnætti var sagt að talað yrði við okkur en það dróst og dróst svo við reyndum að sofa. Það voru um 3.000 flugfarþegar og hátt í 10.000 manns að mótmæla, með ræður og söngva í alla nótt. Þeir lokuðu flugvellinum svo við komumst ekki burt, hvorki flug né hægt að komast af vellinum með bílum,“ segir Holberg.

„Í morgun var enginn hér frá yfirvöldum og engir starfsmenn flugfélaga, þetta var alveg stórskrítið. Við fengum hvorki vott né þurrt í um 18 klukkutíma frá því að við komum á völlinn og höfum ekki enn fengið neitt. Mótmælendurnir komu með birgðir með sér og sögðust ætla að vera þarna í nokkra daga,“ segir Holberg.

Hann segist hafa heyrt af einhverjum sprengingum en að lætin í mótmælendunum hafi verið svo gífurleg að hann hafi ekki heyrt í þeim sjálfur.

Starfsmaður danska sendiráðsins hafi sagt að neyðaráætlun væri í gangi og að herinn myndi sjá um að koma okkur burt. Á morgun verði frekari fréttir af því hvernig og hvenær farþegunum verði komið í burtu. „Það var mikill hiti í fólki og óþægileg staða að lenda svona mitt á milli í átökunum,“ segir Holberg.

Holberg Másson