Taj Mahal hótelið í Mumbai (áður Bombay) á Indlandi, stendur í ljósum logum og sprengingar heyrast frá byggingunni. Vopnaðir menn héldu vestrænum ferðamönnum í gíslingu í hótelinu og lét lögreglan til skarar skríða.

Eldur braust skyndilega út á efri hæðum hótelsins þar sem ferðamönnum var haldið í gíslingu. Ekki er ljóst hvernig eldurinn kviknaði en hann braust eftir að sumum gíslanna hafði verið fylgt út úr byggingunni. 

Lögregla og öryggissveitir höfðu áður umkringt hótelið og annað fimm stjörnu hótel í borginni, Trident, en vopnaðir menn höfðu áður ráðist til inngöngu í hótelin og tekið gesti í gíslingu. 

Taj Mahal hótelið er jafnan talið eitt af bestu hótelum í heimi.  

Íslamskur hópur sem kallar sig  Deccan Mujahedeen hefur lýst yfir ábyrgð á árásum í borginni í dag þar sem um 80 manns létu lífið og 200 særðust. Sendi hópurinn tölvupóst til fjölda fjölmiðla þar sem hann lýsti ábyrgðinni á hendur sér.