Tvö verk eftir Picasso, einn mesta listamann allra tíma, seldust á uppboðinu.

Fjöldi fólks sótti listmunaupp í Jerúsalem í dag í von um að geta gert reyfarakaup á verkum heimsfrægra listamanna. Það sama á við um einstaklinga og fyrirtæki að lausafjárstaðan er í mörgum tilfellum ekki góð og vonuðust kaupendur til að seljendur myndu neyðast til að selja listaverk sín á niðursettu verði.

Þvert á stemninguna fékkst metverð fyrir málverk á ísraelskum uppboði. Það var þó undantekning og voru lág verð reglan.

Uri Rosenbach, stjórnandi uppboðsfyrirtækisins Matsart, sem stóð fyrir uppbogðinu, sagði flest verkin hafa selst á 20 til 30 prósent lægra verði en ef þau hefðu verið boðin upp í fyrra.

Sagði Rosenbach mörg verkanna hafa selst á enn lægra verði, jafnvel undir áætluðu raunverði.

Tvær teikningar eftir snillinginn Pablo Picasso voru í hópi verka sem seldust á mjög lágu verði. Önnur fór á 18.000 Bandaríkjadali, hin á 20.000 dali.

Þá var olíuverk eftir ísraelska listmálarann Reuven Rubin, sem búist var við að myndi seljast á 80.000 dali, slegið á 70.000 dollara.

Að sögn Rosette Antebi, sem stjórnaði uppboðinu, var greinilegt að margir höfðu auga með þeim verkum sem til sölu voru, enda hefði fjöldi skráðra þátttakenda í gegnum símann og netið tvöfaldast frá síðasta uppbogði Matsart.

Það var einnig fjölmenni í uppboðssalnum og þurfti að sækja fleiri stóla til að koma öllu fólkinu fyrir. Urðu margir að láta sér lynda að standa á göngum, jafnvel í anddyri King David-hótelsins, þar sem uppboðið fór fram.

Málverkið sem setti met á ísraelsku uppboði var eftir franska hughrifsmálarann Camille Pissarro.

Metur Antebi það svo að í góðu árferði mætti vænta þess að verkið færi á milljón dali en að vegna lausafjárstöðu eigandans hefði verðið verið lækkað í 700.000 dali.