Allir árásarmennirnir, sem voru felldir í Mumbai á Indlandi í síðustu viku, voru Pakistanar. Þetta segir Shakeel Ahmad, ráðuneytisstjóri indverska innanríkisráðuneytisins, við breska útvarpið BBC í dag. Alls létu 172 lífið og um 300 særðust í borginni þegar 10 vopnaðir menn gerðu samræmdar árásir víða í borginni á miðvikudag.

„Við höldum því ekki fram, að hryðjuverkamennirnir hafi notið stuðnings stjórnvalda í Pakistan," segir Ahmad en heldur því jafnframt fram, að á svæðum í Pakistan sé lagt á ráðin um aðgerðir gegn Indlandi. 

Indverska fréttastofan PTI sagði í gær, að ýmsir innan indversku ríkisstjórnarinnar telji, að indversk stjórnvöld eigi að draga sig út úr friðarferlinu með Pakistan.  Manmohan Singh, forsætisráðherra, er sagður afar óánægður með að Pakistanstjórn skuli ekki hafa gripið til harðari aðgerða gegn hryðjuverkastarfsemi en raun beri vitni.

Einn af árásarmönnunum 10 náðist á lífi. Hann er Pakistani og hefur veitt upplýsingar um hina árásarmennina, að sögn Ahmads. Maðurinn, sem heitir Ajmal Qasab, fékk þjálfun hjá pakistönsku samtökunum  Lashkar-e-Taiba, sem berjast gegn yfirráðum Indverja í Kasmírhéraði. Samtökin stóðu m.a. fyrir árás á indverska þingið árið 2001.

Asif Ali Zardari, forseti Pakistans, hefur beðið Indverja að refsa ekki Pakistan fyrir árásirnar í Mumbai. Hann segir, að herská samtök í Kasmír búi yfir nægum styrk til að hrinda af stað stríði milli landanna.

„Þótt herskáir einstaklingar hafi tengsl við   Lashkar-e-Taiba, hverjum haldið þið að við berjumst gegn?" spyr Zardari í blaðinu Financial Times í dag.