Heimili Moniku Halbe í Wenden, skammt frá Frankfurt, þar sem voðaverkin voru framin.

Dómstóll í Siegen í Þýskalandi hefur dæmt móður í rúmlega fjögurra ára fangelsi fyrir að myrða tvö barna sinna.

Málið vakti mikinn óhug í Þýskalandi þegar það kom upp í maí síðastliðnum.

Monika Halbe, sem nú er 44 ára var sakfelld fyrir manndráp en réttað var yfir henni vegna tveggja nýfæddra barna sem hún er talin hafa myrt árin 1998 og 2003. Halbe geymdi lík barnanna í frystikistu í kjallara heima hjá sér. Lík þriggja barna fundust í frystikistuni en ekki var réttað yfir Haalbe vegna þriðja líksins þar sem svo langt var um liðið og sá verknaður var fyrndur.

Haalbe neitaði að hafa drepið börnin en sagðist hafa geymt þau í frystikistunni svo þau væru alltaf nálæg.

Það var sonur Halbe sem fann systkyni sín í frystikistunni þegar hann var að sækja pizzu í kistuna.

Ákæruvaldið reyndi að sýna fram á að Halbe hefði ýmist kæft eða drekkt kornabörnunum og fór fram á átta og hálfs árs fangelsisrefsingu yfir henni.

Verjendur Halbe fóru fram á að dómurinn yrði skilorðsbundinn. Hún hefði þegar komið upp þremur börnum og hefði glímt við alvarlegan áfengisvanda.

Dómari taldi fangelsi í fjögur ár og þrjá mánuði hæfilega refsingu.

Málið er ekki hið fyrsta sinnar tegundar í Þýskalandi. Fyrir tveimur árum fannst lík smábarns í ísskap en foreldrarnir, sem áðir voru eiturlyfjafíklar höfðu stungið því þar inn eftir að þau myrtu það.

Það sama ár var móðir dæmd í 15 ára fangelsi fyrir að myrða átta börn sín. Konnan hafði falið líkin í blómapottum og fiskatjörn í garði við heimili sitt, skammt frá landamærum Póllands.