AP

Ríkisstjórn Írlands og Evrópusambandið hafa heitið að leggja tæplega 200 milljónir evra í sjóð sem bæta á írskum svínabændum tjón vegna díoxínmengunar í greininni. Írsk stjórnvöld heita 180 milljónum evra í bjargráðasjóð fyrir svínabændur. Framlag ESB í sjóðinn verður 15 milljónir evra.

Fyrir tæpri viku bárust fréttir af því að þrávirka eiturefnið díoxín hefði fundist í írsku svínakjöti og afurðum unnum úr því. Var allt svínakjöt sem var framleitt eftir 1. september innkallað á Írlandi eftir að 80-200 sinnum meira díoxín en leyfilegt er mældist í svínum á 47 svínabúum og var mengunin rakin til fóðurs dýranna.´

Auk þess að innkalla svína og afurðir, var farið fram á að öllum gripum á búum þar sem eiturefnið fannst yrði slátrað. Bændur neituðu nema stjórnvöld bættu að fullu tjónið og á það hefur nú verið fallist.

Um fimm hundruð svínabú eru á Írlandi og hafa um 7000 manns atvinnu af búgreininni. Óvíst er hver áhrifin af þessu verða en sérstakur sjóður verður settur á laggirnar til að koma til móts við bændurna.