Íraski blaðamaðurinn sem kastaði skóm í George W. Bush, forseta Bandaríkjanna, á blaðamannafundi á sunnudag, er handleggsbrotinn og rifbeinsbrotinn, að sögn bróður blaðamannsins. Auk þess sé hann með áverka í andliti og skurði á hendi.

Durgham Zaidi, bróðir blaðamannsins Muntazer al-Zaidi, segir í samtali við AFP fréttastofuna ekki vita hvort hann særðist á blaðamannafundinum er öryggisverðir yfirbuguðu hann eða í varðhaldi. 

Að sögn Durghams Zaidi er bróðir hans í haldi í búðum á Græna svæðinu þar sem sendiráð Bandaríkjanna og helstu stjórnsýslustofnanir Íraks eru til húsa í Bagdad, höfuðborg Íraks.

Zaidi, sem er 29 ára gamall, er fréttamaður á sjónvarpsstöðinni Al-Baghdadia, er nú mjög umdeildur í landi sínu. Margir Írakar segja bræði hans í garð Bush réttlætanlega, aðrir eru hneykslaðir. Þúsundir manna efndu í gær til útifunda til að krefjast þess að honum yrði sleppt úr haldi.

Vilji arabar sýna einhverjum mikla óvirðingu er fátt talið heppilegra en að traðka á þeim með skítugum skónum. Bush reyndist of viðbragðsfljótur fyrir al-Zeidi og vék sér undan. Forsetinn virtist lítt móðgaður, sagði glaðhlakkalegur að skórinn hefði verið „númer 10“. Al-Zeidi er úr röðum sjíta og mun hata bæði Bandaríkjamenn vegna hernámsins og trúbræðurna Írana sem hann segir hafa efnt til „siðferðislegs“ hernáms í Írak.