Íbúar í Gíneu fylgjast með hersveitum sem eru við eftirlitsstörf í borginni Conakry í gær. Reuters

Herinn í Gíneu, sem hefur gert tilraun til valdaráns í landinu í kjölfar fráfalls Lansana Conte, forseta landsins, hefur birt lista yfir þjóðarráð sem á að stjórna landinu. Alls eru 32 nöfn á listanum.

Mussa Dadis Camara, hershöfðingi í gíneska hernum og sá sem fer fyrir valdaráninu, er efstur á listanum. Þar er einnig að finna nöfn sex óbreyttra borgara, að því er fram kemur á fréttavef BBC.

Camara mætti í viðtal í ríkisútvarpi landsins þar sem hann sagði að búið væri að víkja stjórninni frá og að aðrar stofnanir væru óvirkar.

Ahmed Tidiane Souare, forsætisráðherra landsins, hefur hins vegar vísað þessu á bug. Hann segir að ríkisstjórnin sé enn virk.

Flestir þeirra sem eru á listanum yfir þá sem eiga sæti í þjóðarráðinu eru háttsettir herforingjar.