Yfir 270 Palestínumenn eru látnir eftir árásir Ísraela á Gaza ströndina í gær og í morgun. Talið er að Ísraelar hafi varpað yfir 100 tonnum af sprengiefni yfir Gaza, þar sem Hamas samtökin eru við völd. Er helgin að verða sú mannskæðasta í Miðausturlöndum í mörg ár. Hóta Ísraelar að árásunum verði haldið áfram þar til Hamas hættir að gera eldflaugaárásir á suðurhluta Ísrael.

Flestir hinna látnu eru úr öryggissveitum Palestínumanna en einnig eru óbreyttir borgarar meðal hinna látnu. Yfir 400 eru særðir. 

Árásir Ísraelsmanna komu mjög á óvart og hafa verið fordæmdar víða í Arabaheiminum sem og annars staðar í heiminum. Hins vegar hafa bandarísk stjórnvöld lýst því yfir að ábyrgðin sé hjá Hamas.

Öryggisráð Sameinuðu þjóðanna lýsti í morgun yfir alvarlegum áhyggjum yfir ástandinu á Gaza og hvatti Ísraela og Palestínumenn til  þess að hætta ofbeldinu og hernaðaraðgerðum. Þetta kemur fram í yfirlýsingu frá Öryggisráðinu sem kom saman til neyðarfundar í nótt. Fundurinn stóð yfir í fjórar klukkustundir. Telur Öryggisráðið nauðsynlegt að koma á vopnahléi á ný á milli Ísraela og Hamas-hreyfingarinnar og að tryggt verði að nauðsynjar verði fluttar til íbúa á Gaza og þeim gefinn kostur á læknisaðstoð.